Erandiok «elkartasun osoa» adierazi die "gerran dauden herrialdeetako errefuxiatuei», eta prest agertu da «merezi duten harrera eraginkor eta iraunkorra" egiteko. Humanitate-arazoari erantzuna emateaz gainera, ordaindu gura dute iraganean milaka euskal herritarrek migrazioaren eta "erbeste politikoaren drama pairatu behar izan zutenean jaso zuten elkartasuna".
Berbez gainera, hainbat neurri jasotzen ditu Udal Bozeramaileen Batzordeak aho batez onartutako testuak. Horietako bat da Europar Batasunari "asilo politikoa eskatzen duten pertsonakaz eskuzabaltasunez jokatzeko" eskatzea, "immigrazio eta babesa emateko politika bateratuen" bidez. Era berean, Erandioko Udalak konpromisoa hartu du errefuxiatuei, eta, bereziki, umeei "harrera egiteko bitartekoak" jartzeko; esaterako, "laguntzak eta etxebizitzak".
Auzotarrak, laguntzeko prest
Horretarako, euren ekarpena egin gura duten pertsona eta kolektiboakaz lan egingo du Gizarte Ekintza Sailaren bidez, baliabideen informazioa batu eta erregistro bat prestatzeko. "Hainbat auzotarrek, daborduko, etxeren bat eskaini digute", azaldu du Joseba Goikouria alkateak. Bestalde, iheslariakaz lanean dabiltzan Euskadiko CEAR eta ACNUR erakundeei 3.066,92 euroko laguntza eman die Udalak. Goikouriak adierazi duenez, EH Bilduk eta PSE-EEk adierazpen bana aurkeztu zuten, eta alderdi denek begi onez ikusi eta ekarpena egin zuten akordioa errazteko: "borondatea egon da".
Ana Crespo EH Bilduko bozeramaileak azpimarratu duenez, "herrian bestelako beharrak egon badaude. Ez zaie bizkarra emango: horrek gehitu egingo du, ez ordezkatu".
Adierazpena