Dantzaz betetako aste-akabua izango da Astrabuduan

Erabiltzailearen aurpegia Hiruka 2015eko urriaren 14a

Trabudu dantzari-taldeak 2014an egindako omenaldia Jose Andres Mendiguren Kamiruaga elkartearen sortzaileari. © EAJ

Datorren urtean, 2016an, beteko ditu 40 urte Astrabuduko Trabudu Dantzari Taldeak. Elkarteak batzarra deitu du urtemuga biribil eta berezi hori ganoraz ospatzeko. Hitzordua urriaren 18an ipini dute, domekan, goizeko 12:00etan, anbulatorio zaharrean. Trabuduk deialdi zabala egin die taldeko kide zein partaide ohi denei bertara daitezen, eta ospakizunen diseinuetan zein ekimenetan parte har dezaten. Halere, ekimen gehiago prestatu du Trabuduk: erromeria zapatuan eta martxan dagoen euskal dantza eta musika ikastaroa.

Erromeria

Aurreko egunean, zapatuan, berriz, dantza-plaza egingo dute Astrabuduko Jose Andres Mendiguren plazan, 19:00etatik 20:30era. Erromeria horretan, txistulari, albokari eta trikitilariek aukera emango dute “euskal dantzak praktikan jarri edo ikasteko”, Trabuduko kideek azaldu dutenez.

Azkenik, dantzari-taldeak iragarri du oraindino matrikulazioa zabalik dagoela euskal dantza eta musika ikasteko tailerrean. Besteak beste, alboka, txistua, trikitia, panderoa eta txalaparta joten ikasiko dute. Izena eman gura dutenek Mendiguren plazako Trabuduren egoitzara joatea besterik ez dute egin behar. Era berean, dantzari-taldearen posta elektronikora mezu bat ere idatz dezakete: trabududantzaritaldea@gmail.com.

Kultura Erandio
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun