Kanpomartxo prestatzeko lehenengo batzarra deitu du Berbotsek

Erandion Euskaraz Berbots taldeak jakinarazi duenez, Kanpomartxo euskaltzaleen festaren 22. edizioa martxoaren 20an antolatuko dute aurten, Martiartun. Gabonetako oporretatik bueltan, Berbotseko kideek uste dute "lanari ekiteko garaia heldu" dela. Kontuak hala, konbentzituta daude aurten "Kanpomartxo zoragarria egingo" dutela, "zuon ideiak, zuon laguntza, zuon lana, eta zuon ilusioari esker". Gura duten herritar denen parte-hartzea ahalbidetzeko eta iritzi, iradokizun, ekarpen eta lanak elkartrukatzeko, "bileratxoa" egingo dute urtarrilaren 20an, eguaztena, 19:15ean. Deialdia Berbotsen lokalean jarri dute, Altzaga auzoko Bekoa ikastetxeko 2. solairuan.