Pasa den zapatuko goizaldean, otsailak 6, Erandioko Tartanga kaleko telefonia-denda bat lapurtzen ahalegindu ziren hainbat ezezagun, auto bat biltegiaren leihotzarraren aurka bota ostean. Ertzaintzaren iturriak aipatuz, "El Correo" egunkariak zabaldu duen albistearen arabera, Erandioko Udaltzaingoek eta Polizia autonomikoek lapurrak "harrapatu zituzten in fraganti". Bertsio horren arabera, gaizkileek bi autotan ihesaldiari ekin zioten, eta gelditzeko agindu zietenean "agenteak harrapatzen ahalegindu" ei ziren. Une horretan, polizia batek arauzko armaz tiro bi egin zituen auto baten aurka. Halere, lapurrek ihes egitea lortu zuten.
Zabaldutako datuen arabera, lapurrek erabilitako autoak honakoak ziren: Opel Vectra modeloko ibilgailu gorri bat, Derion ostutakoa, eta Opel Astra zuri bat. Auto biak ordu batzuk beranduago topatu zituzten; gorria Bilboko Arabella auzoan zegoen goizeko lehen orduan, eta hainbat kalte zituen: jaurtigaiaren talka eskumako aurreko atean, kolpe bat automobilaren muturrean eta gidariaren ateko sarraila bortxatuta, besteak beste. Barruan, txano bat eta dendako hainbat objektu topatu zituzten. Ordu batzuk beranduago, Opel Astra zuria kiskalita agertu zen Bilboko Peñascal auzoan. Antza, autoa aztarnak desagerrarazteko erre zuten.
Pasa den urtarrilaren 26an, telefonia-denda bera lapurtu zuten hainbat ezezagunek BMW auto bat dendaren aurka botaz; zapatuko berberak, polizien ustez. Orduan, telefono mugikorrak eroan zituzten. Ebasketa hori baino egun batzuk lehenago, beste lapurreta bat izan zen Galdakoko arropa-denda batean, "modus operandi" berdina erabiliz. Markadun arropa eta zapatilak eroan zituzten.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.