Hiri Hondakin Solidoak selektiboki batzeko 2015ean egindako ahaleginen emaitzak jakinarazi ditu Erandioko Udalak. Denera, erandioztarrek 9.708.348 kilo zabor sortu zituzten iaz, 2014an baino %2,14 gehiago. Kopuru horretatik 8.290 tona sailkatu barik bildu ziren, %85,39; 2014an %85,80 izan zen nahastuta botatzen zen zarama.
Kontuak hala, selektiboki batzen den %14,61 kopuruaren gainean berba egin du Udal Gobernuak. Arrizen Monasterio zinegotziaren aburuz, "egin diren sentsibilizazio-kanpainen emaitza da ingurumenaz hiritarrek duten kontzientziazio zabalago hori, baita ikasturtean eskoletan egin diren birziklapenaren gaineko berbaldiena ere; etxeko txikienek senideen artean dibulgazio-lan garrantzitsua egiten dutelako".
Datu nabarmena da hiru urtean herriko sendien %11,8k hondakin organikoak biltzeko bosgarren ontziagaz bat egin dutela, ekimen boluntarioa izanda. Hala ere, 1.124 familia horietatik, 63 bakarrik apuntatu ziren pasa den urtean, beheranzko joera, beraz.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
