Eremu horretako 17.000 bat metro koadro gako nagusia dira horretan, Erandioko Udalak 2010ean Azpiegiturakegaz hitzartu baitzuen hori. Etxe horien salmentaz finantzatuko dute Abaroak kaltetutako 67 familien birkokapena; izan ere, 2007an, etxe barik utzi zituzten Altzagako Ibarra eta Antxon Fernandez kaleetako zein San Agustin plazako auzokide horiek.
Egoitz Bilbao Hirigintza zinegotziaren aburuz, operazio horren aurka bozkatzea auzokideen sufrimenduagaz jolastea da. Gaineratu zuenez, "kontran bozkatzea edo abstenitzea 7.052 metroko lorategiei ezetz esatea da", baita 16.257 hornidura-metro, 402 zuhaitz eta 913 parking-lekuri ere, "haietako 255, publikoak". Jeltzaleak esan zuen Udalak 3.850 metro koadro irabaziko dituela behar bereziak dituzten kolektiboentzako erresidentzia-gunerako.
EH Bilduk, ordea, salatu zuen etxebizitza-kopuru hori ez dela behar, non eta Altzagan balizko eremu berde bakar izan dezakeen gune horretan. Era berean, Joseba Goikouria alkateari galdetu zioten ea hori den "EAJren apustu politikoa". Goikouriak auzokideei emandako hitza beteko duela erantzun zuen.