Pasa den martxoaren 29an, erandioztar bat eta beste bost euskal herritar deklaratzera deitu zituzten Espainiako Auzitegi Nazionalaren magistratuek. Amnistiaren Aldeko eta Errepresioaren Aurkako Mugimenduak jakinarazi duenez, auziperatuak "amnistiaren aldeko militanteak" dira, eta Carlos Urquijo Espainiako Gobernuaren ordezkari "faxistak" eta APAVT "elkarte ultraeskuindarrak" ipini dituzte haien aurkako salaketak, 2015eko abuztuan Bilbon egin zen amnistiaren aldeko manifestazioan "terrorismoari gorazarrea egin geniola leporatuta".
Hala, "osasun-arazoak dituzten gure kide bi salbu", gainerakoak ez ziren deklaratzera aurkeztu, erandioztarra tartean, epaitegiari desobedientzia eginez. Agertu ziren euskal herritarrek uko egin zioten magistratuen aurrean adierazpenik egiteari. Horren ostean, epaileek berriro dei ditzakete agertu ez diren pertsonak, edo zuzenean segurtasun-indarrei haiek atxilotzeko agindu.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!