Apirila bukatu bitartean, Erandion elikagaiak batzen dabil Loiuko Danontzat elkartea, Siriako gerratik ihes egin eta Greziako Kios irlan errefuxiatu direnentzat. Bertan, Zaporeak boluntario-talde donostiarrak hilabeteak daroatza milaka otordu ematen. Orain, Vial errefuxiatu-eremuko 1.200 bat pertsonari jatekoa ematen diete, haietako asko umeak.
Ekarpena egin gura dutenek honako lekuetan egin dezakete: Erandiogoikoan, Damatxo emakumeen-elkartearen eta Goi-Alde dantza-taldearen lokaletan; Astrabuduan, Josu Murueta; eta Altzagan, Eroski, Eguzkilore kafetegia, Puri janari-dendan eta Modas Conchi. Danontzat elkarteak jakinarazi duenez, sukaldariek gehien behar dituzten elikagaiak dira lekaleak, pasta, kakao-hautsa, esnea, olioa eta umeentzako jana. Bildutako material dena Donostiara eroango dute Danontzat-eko lagunek eta handik Kiosera Zaporeak elkarteak igorriko du.
Loiuko elkarteak ohartarazi du Egeoko kostaldean egoera "dramatikoa" dela. Horregatik bat egin dute donostiarrek egindako ekimenagaz: "gu beti gaude prest behar den tokian laguntzeko. Eta errefuxiatu siriarrakaz egiten ari dena penagarria da benetan…".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.