Joseba Goikouria Erandioko alkatea ikertzen dabil Bilboko 3. instrukzio-epaitegia, ustezko ez-egitezko prebarikazioagatik. Auzi aurreko diligentziak 2014an zabaldu zituen epaitegiak, Erandiogoikoko txatartegi bat hamabost bat urtean lizentzia barik funtzionamenduan ibili delakoan.
Goikouriagaz batera, ardura beragatik, epaileak Hirigintza Arloan jardun duten zinegotzi bi ikertzeari ekin dio: Asier San Nicolas eta Itziar Coba. Ikerketa agintzeko autoan, magistratuak baztertu egin du hiru politikariek delitu ekologikorik egin izana, auzia zabaldu zuen salaketan esaten zenaren aurka.
Joseba Goikouriak ez du auziaz deklaraziorik egin gura izan, "martxan dabilen auziarekiko errespetuagatik", baina argitu du "gaia antzinatik" datorrela, eta urte horietan enpresak "ez duela auzokideen kexarik sortu bere funtzionamenduagatik". Bitartean, alkateak helegitea ipini du daborduko. Epailearen esku lotuko da epaiketa abiatzea ala ikerketa bertan behera uztea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
