Martxan da Beldur Barik Jarrera! Lehiaketaren 7. edizioa. Lehiaketa horregaz emakumeek jasaten duten bereizkeria-egoerei aurre egiten dioten neska-mutilen arte-adierazpen mota denak onartu, baloratu eta bultzatzen dira. Lehiaketa orokorrean EAEko 12 eta 26 urte arteko neska-mutilek parte har dezakete; halere, Erandioko Udalak udalerri mailako lehiaketa ere antolatu du. Horretan, orokorrean legez, parte-hartzaileek indarkeria sexista aurreikustearen ideia duten 5 minutuko ikus-entzunezkoak aurkeztu beharko dituzte, 3 proiektu gehienez.
Lehiaketa banatuta dago maila bitan: lehenengoa, 12 eta 17 urte arteko neska-mutilei zuzenduta dagoena; bigarrena, 18 eta 26 urte arteko gazteei begirakoa da. Lehiaketan, lehenengo mailako irabazleek 250 euroko txartela jasoko dute, udalerriko dendetan erosteko balio duena. Lehenengo kategoriako aipamen berezia dutenek, berriz, 100 euroko bonua jasoko dute. Bigarren mailako irabazleek eta aipamen bereziko saridunek ere sari berdinak jasoko dituzte.
Erandioko lekuko lehiaketan parte hartzeko epea joan den irailaren 9an hasi zen, eta azaroaren 9ra arte egongo da zabalik lanak aurkezteko aukera. Lehiaketako proiektu irabazleak Beldur Barik Udal Sari Banaketan jakinaraziko dituzte. Udalak jakinarazi duenez, eguna eta lekua oraindino zehaztu barik daude.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
