Lehenengoz EAEn diseinatu eta ekoitzi den olatu-energiaren kaptadorea egiten dabil Navacel enpresa erandioztarra. Energiaren Euskal Erakundeak sustatu eta Oceantec Energyk garatu du prototipo hori, eta itsasoaren energia elektriko bihurtzeko bideak garatzea du helburu. Kaptadore horrek altzairuzko hiru zati ditu; horiek Navacelen mihiztatzen dira, eta buia bertikal baten forma dute. Hor barruan doa ekipamendu mekanikoa eta elektrikoa, olatuen mugimenduagaz energia sortzen duena.
Mutrikuko portuan dagoen olatuen instalazioak darabilen teknologia bera erabiltzen du, baina buia formako gailu batean, itsaso zabalean erabiltzeko egokituta dagoena.
Udaberrian, Mutrikuko energia-instalazioan probak egin dituzte. Horiek balio handiko datuak lortzeko aukera eman dute, errendimenduaren eta sorkuntzaren inguruko datuak, hain zuzen ere. Aurrerantzean, Armintzako kostaldean dagoen Bimep estazioan egingo dituzte probak, urtebetez.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!