Euskarak 365 egun

Erandiok pauso bat aurrera eman gura du euskararen erabileran

Ohi bezala, aurretik erosi behar da kantu-afarirako txartela.

Euskararen aldeko jarrera izatetik, euskara erabili eta euskaraz bizitzera pasa gura dute.

Erandioko euskaltzaleek Euska­raren Nazioarteko Egunerako egitarau zabala antolatu dute. Hala abenduaren 1ean, eguenean, berbodromoa egiten hasi dira Altzagako azoka zaharrean. Arrastian, Irailaren 23a plazan umeentzako tailerrak, kantuak eta txokolate-jana izango dira. Kalezulo gaztetxeak 21:30etik aurrera antolatu ditu azken pintxo-potea eta bakarrizketa.

Hurrengo egunean, barikuan, Erandiogoikoko Gizarte Etxeak euskarazko ekitaldiak antolatuko ditu 17:00etatik aurrera: umeentzako tailerrak, Maddi eta txalaparta antzezlana, bertso-papera, dantza modernoa, pandero-joleak eta kalejira. Ondoren, 19:45ean, Euskadi plazan izango dira ekitaldia eta triki-kanta-kalejira. Gaueko 10:00etan kantu-afaria izango da Dandaka jatetxean; txartelak salgai daude daborduko.

Zapatuan, eguerditik aurrera Astrabuduan ospatuko dute Euskararen Nazioarteko Eguna. Besteak beste, 13:00etan berbalagunak batuko dira eta ondoren izango da ekitaldi nagusia, “pauso bat aurrera” emateko gonbidapena zabaltzeko.

Ekimenen kartela

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun