Uretan egin beharreko lanak falta zaizkie oraindino Murueta ontziolako beharginei. Enpresak horiek bukatzea aurreikusi du 2017ko apirilerako. Orduan, Green Bay Sur armadoreari emango dio, Algecirasko portuan lanean ipin dezan. "Green Cádiz" Murueta ontzioletatik irtengo den 314. ontzia izango da.
3.481 langabe gutxiago
Uretaratze-ekitaldian izan ziren Josu Erkoreka Eusko Jaurlaritzaren Bozeramaile eta Gobernantza Publiko eta Autogobernuko sailburua, Arantxa Tapia Ekonomiaren Garapeneko eta Azpiegituretako sailburua, Juan Manuel Arana Muruetako presidentea, María Antonia Urizar ontziaren amabitxia eta "Green Cádiz" bedeinkatu zuen Jon Etxebarria apaiza, besteak beste.
Uretaratzearen ondoren, Tapia sailburuak Ekoizpen Industrialaren Indizearen gaineko datuak eta langabezia-datuak baloratu zituen. Azaroan EAEn 3.481 langabe gutxiago zenbatu direla-eta honako hau esan zuen: "Ekonomia hobetzen ari da eta enplegua sortzen, hau da bilatzen ari garena". Halere, sailburuak berrikuntzaren aldeko apustua aldarrikatu zuen, euskal industriarako ez baitago "konfort zonarik". "Lanean jarraitu behar da eta etorkizunari aurre egiteko euskal industria posizio onenean egon dadila lortu behar dugu", gehitu zuen.