Erandioztar bi, podiumean, Sahararen alde

Begoña Beristain eta Jon Salvador. © SAUCONY

Begoña Beristain eta Jon Salvador atleta erandioztarrek podiuma zapaldu zuten pasa den otsailaren 28an, Saharako Maratoian. Biak ala biak hirugarren postuan heldu ziren, Aljeriako basamortutik 42 kilometro luze bete ostean. Seme eta iloba banagaz batera lehiatu arren, Salvador indarrez oso ahul heldu zen helmugara, arkutik pasatu bezain laster zorabiatu egin zen.

Erandioztarrari seruma ipini behar izan zioten probako erizainek. Izan ere, lasterketa berez oso gogorra da, baina aurtengo edizioa ohikoa baino askoz muturrekoagoa izan da, elementu biren erruz: 32 graduko tenperatura eta kontrako haize-ufada gogorrak. Beristain eta Salvador ez ziren izan probako bizkaitarrik onenak Saharako Maratoiaren 17. edizio horretan. Ohore hori Elena Frechilla kirolari sondikoztarrak lortu zuen, emakumezkorik azkarrena izan baitzen proban. Gizonezkoei dagokienez, irabazlea Giorgio Calcaterra italiarra izan zen. Calcaterra 100 kilometroko munduko txapelduna izan da hiru biderrez.

Sahara Maratoiaren helburuak bi dira, kirol-mailakoak alde batera utzita: herri sahararraren egoera nazioartean gogoraraztea eta jendarte-laguntza zabaltzea Tindouf-eko errefuxiatu-kanpamentuetan. Ohi legez, Euskal Treenbideetako Langileak Mugarik Gabe elkarteak botikak eroan zituen.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun