Joan den astean, Erandioko kaleetan eta plazetan entzuten diren hizkuntzen gaineko azken neurketaren berri eman zuen Soziolinguistika Klusterrak. “Hizkuntzen ahozko kale-erabileraren neurketa Erandion” goiburupeko neurketa hori 2016ko irailean egin zuten, Euskal Herriko beste 128 udalerritan ere egin zen, zazpigarren kale-neurketaren barruan.
Daturik esanguratsuena da Erandioko kaleetan eta plazetan herritarren %2k egiten duela euskaraz. Euskaltzaleek datu positibo legez ikus dezakete, 2011ko kopurua %1,3 baitzen. Horrenbestez, bost urteren bueltan, % 53,85eko igoera izan du euskal hiztunen presentzia aktiboak.
Baina, datu historikoetan apur bat atzera eginez gero, gaur egungo euskararen erabilera oso urrun dago 2006ko kale-erabileraren neurketako %4,2 indizetik. Hala, hamar urtean, %52,38 jaitsi egin da erregistratutako euskararen presentzia udalerrian. Askoz atzerago eginez gero, akordura ekar daiteke 1989ko euskararen erabilera %1ekoa zela Erandion. Beraz, ordutik hona, bikoiztu egin da euskaraz jarduten dutenen kopurua.
Bestalde, oso bitxia da Erandiogoikoan azken bi kale-neurketetan jasotako datuen aldaketa. 2011n, %1,2k egin zuen euskaraz, pasa den irailean, ostera, %10,2. Dena den, komeni da datuak erlatibizatzea, azken emaitzek duten akats-tartea %1,74koa baita. Azken neurketan, tarte hori ahalik eta txikiena izan zedin ahalegindu ziren Soziolinguistika Klusterra eta Erandioko Udala. Horren adierazlea da 2011n 2.231 solaskideren hizkuntza-ekintzak neurtu zituztela, eta, ostera, iaz askoz handiagoa izan zela hartutako lagina: 7.067 pertsona. Bestalde, 2011ko erroldaren arabera, urte hartan Erandioko biztanleen %24,3 zen euskalduna. Beraz, Erandion espero zitekeen erabilera-tasa %3,9koa litzateke, 2011ko erroldaren datuak kontuan hartuta, eta Jose Luis Alvarez Enparantza “Txillardegi”-k sortu zuen euskararen erabilera estimatzeko eredu matematikoaren arabera.
Datu nagusiak
