Jendartea  Erandio 2017-06-22 12:45

Ume gaixoei jolasak erosteko 762 euro batu dituzte pintxo-ekimen batez, Erandiogoikoan

Erandiogoikoko jai-batzordeak eta Loiuko Danontzat elkarteak 762,65 euro batu dituzte, Gurutzetako ospitalean dauden eta minbizia duten umeei jolasak erosteko. Aikor.eus Txorierriko digitalak argitaratu duenez, elkartasun-pintxoen ibilbide bati esker lortu zuten dirua, Gorpuzti jaietan.

 

Ume gaixoei jolasak erosteko 762 euro batu dituzte pintxo-ekimen batez, Erandiogoikoan
Patata-tortillazko pintxo bat, zain. AIKOR | Ikusi handiago | Argazki originala

Elkarteak poz baino pozago daude herritarrek erakutsi duten elkartasunegaz: "Pintxorik jaten ez zuenak ere dirua sartzen zuen itsulapikora". Izan ere, txaranga batek girotuta, honako ibilbidea egin zuten: jai-batzordeko txosna, batzokia, Xcaret, Dandaka, Goikolanda eta jai-batzordeko txosna. Pintxoak Erandiogoikoko tabernek eta elkarteek eman zituzten, eta euro batean saldu ziren.

Bestalde, Danontzat elkarteak iragarri duenez, Loiuko jaietan ere egingo dute elkartasun-pintxoen ibilbidea. Ekimena Udalagaz eta Loiuko Bakarrak gazte-elkarteagaz antolatu dute eta ibilbidea honako hau izango da: Loiuko Bakarrak elkartearen txosna, Jubilatuen Etxea, batzokia, Loiu hotela, Lashoa, Larrakoetxe kirol-taldearen txosna eta Loiuko Bakarrak elkartearen txosna. Gainera, azken geldialdi horretan Txoribikers taldeak emandako pintxoak ere egongo dira. Poteoa 19:30ean hasiko da eta batuko den diru dena  bideratuko dute Gurutzetako ospitaleko onkologia atalean dauden umeentzako jolasak erostera, Erandiogoikoan egin legez. Pintxoak Loiuko tabernek eta elkarteek emango dituzte.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa