Egueneko protestan zazpi puntu salatu zituen ezker abertzaleko sindikatuak:
- Azken zazpi urtetan Udalak ez duela lanposturik bete finkotasunez.
- Lanpostu finkoak amortizatzen dabiltzala Udala, "tantaka-tantaka". Gaur egun, Gizarte Ekintza Sailean administrari-lanpostu bat amortizatu gura dutela dio LABek, "lanpostu horren lan-zama inon agertzen ez den langile ebentual batek betetzen duenean, hori bai, askoz ere soldata txikiagoagaz".
- Obretako brigada egoera larrian dagoela: "lantaldean 16 operari lanpostu dago eta 8 baino ez daude lanean". "Langileen bajak eta jubilazioak ez dituzte ordezkatzen", ziurtatu du LABek.
- Brigadakoek egin dezaketen lan publikoa enpresa pribatuen eskutan lagatzen dutela dio sindikatuak: "gero eta gehiago".
- Kiroldegietan kontu bera gertatzen dela salatu dute langileen ordezkariek: "ez dago udal-langile nahikorik zerbitzua emateko. Udal lantaldean 3 atezain eta mantentze-lanetako ofizial lanpostu bat baino ez dago, 2 kiroldegi goizeko 8:00etatik gaueko 22:30era arte zabalik edukitzeko".
- Udal-lantaldean ez dago ez Berdintasun ez Enplegu arloetako lanposturik.
- Bitartekotasun-tasa "itzela" dela diote: "%40 ingurukoa".
Sindikatuaren ustean, Gobernu Taldeak ez du egoera hori konpontzeko "inolako urratsik eman". Hala, Udalaren Arrazionalizazio Planak proposatutako neurriek ez dute, euren iritziz, zenbait arazo konpontzen: langile falta eta Udalean lanean ari diren pertsona askoren egoera prekarioa. Ostera, "langileen elite baten interesei erantzuten" dietela dio sindikatuak.
Horren aurrean, LAB sindikatuak bestelako enplegu- eta langileentzako politika eskatu du, honako neurriak hartuta:
- Kalitatezko enplegu publikoa sortzea
- Kiroldegietan eta obretako brigadan, bereziki.
- Zerbitzu publikoei eusteko eta zerbitzuak ganoraz emateko.
- Gai garrantzitsuak udal-lantaldeko langileen bidez kudeatzeko. Adibidez, Berdintasuna eta Enplegua.
- Zerbitzuak ez azpikontratatzea
- Baldintza hobeak dituzten lanpostuak izateko.
- Lan-kargak arintzeko.
- Diru publikoaren kudeaketa hobea egiteko, langileen mesedetan.
- Enplegu Publikoaren Eskaintza egin eta lanpostuak finkotasunez betetzeko, lantaldeko 200 lanpostutik 70 bitartekoakaz beteta edo hutsik baitaude.