Kultura  Erandio 2017-09-08 15:41

Coldplay taldearen kantak entzun ahal izango dira Astrabuduan, zapatuan

Daborduko, hogei urte bete ditu Coldplay rock-talde ingelesak eta urtemuga hori ospatu ahal izango dute zaleek bihar, zapatuan, Erandioko Astrabudua auzoan. Halere, Londreseko laukotea ez da Uribe Kostara hurbildu; hala, Chris Martin, Jon Buckland , Guy Berryman eta Will Champion beharrean, Coldday omenezko talde katalana izango da entzungai, 21:00etatik aurrera, Josu Murueta plazan.

Coldplay taldearen kantak entzun ahal izango dira Astrabuduan, zapatuan
Laukotea, artxiboko irudian. © COLDDAY | Ikusi handiago | Argazki originala

Erandioko Udalak zabaldu duenez, katalanak ere urtemuga biribila bizitzen dabiltza aurten, apalagoa bada ere. Izan ere, Coldday 2012an sortu zen. udal-iturrien arabera, "Coldplayri omenaldi on, zintzo eta fidel bat egiteko asmoz", lau musikariren, euren talentuaren eta indarrak batzearen emaitza da talde hori. "Funtsean, Coldplayzaleek Coldplayzaleentzat sortutako talde bat da", azpimarratu dute. Bartzelonatik datoz; hain zuzen, han hasi ziren beste tributu-talde batzuen artean ezagun egiten. Lana ondo egitekoak direnez, oholtza mota denetara joan izan dira, jai pribatuetara zein antzoki eta entzunareto handietara. Gainera, Europako hainbat herrialdetan jo dute, eta laster, Asia ekialdean (Malaysian, Indonesian, eta abarren) ibiliko dira.

"Coldplayren musikaren magia dena eroaten du oholtzara Colddayk. Interpretazioa ikaragarria da, argiak, eszenaratzea... Coldplayzale batek espero duena. Colddayk Coldplayren abesti ezagunenak eta onenak jotzen ditu, 'Parachutes' lehen diskotik hasi eta 'A head full of dreams' azkenengoraino", Erandioko Udalaren zabaldutako informazioaren arabera.

Coldday taldearen promozio-bideoa (© Coldday)

2017/09/09 21:00

Josu Murueta plaza Erandio

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa