Jokin Astarloa Zarraga 19 urteko erandioztarraren aldeko hileta-elizkizunak herenegun, zapatuan, egin zituzten Erandiogoikoko Andra Mari elizan. Rally-kopilotua zena eguaztenean, abenduaren 6an, hil zen Oiz mendian, Berrizen izan zen zirkulazio-istripu batean; adin bereko beste gizon bat larri zauritu zen. Azken hori Sondikakoa da eta Gurutzetako erietxera eroan zuten.
Eusko Jaurlaritzaren Segurtasun Sailak zabaldutakoaren arabera, ibilgailua bidetik irten eta maldan behera erori zen. Bertan zihoazen lagun biak harrapatuta geratu ziren barruan. 19:14ean larrialdi zerbitzuek abisua jaso zuten eta suhiltzaileak eta anbulantziak bertaratu ziren. 20:30ean lortu zuten suhiltzaileek lagun biak bertatik ateratzea.
Erandiogoikoko gaztearen heriotza egiaztatu ostean, izapideak egin eta Bilboko Auzitegiko patologia-zerbitzura igorri zuten, autopsia egiteko.
Ertzaintzak ikerketa abiatu du, gertaeraren nondik norakoak argitzeko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.