Udako jaiak 2018

Bihar eta etzi jaia nagusi izango da Erandiogoikoan

Eguaztenean erakustaldia emango du Goi-Alde dantza-taldeak. © GOI-ALDE DANTZA TALDEA

Andramari jaien ekimen gehienak bi egunean metatuko dituzte aurten. Berbarako, bihar eta etziko egitaraua osatzen dute paella-lehiaketak, dantza-erakustaldiak, erromeriak, ume-jarduerek eta abarrek.

Bihar, martitzenean, hasiko dituzte aurten Andra Mariaren omenezko jaiak Erandiogoikoan, jai-egunaren bezperan. Hurrengo egunean, eguaztenean, jaiak amaitu bitartean, ospakizunez gozatzeko aukera izango dute bertoko herritarrek eta auzora hurreratuko diren pertsona den-denek. Azken urteotan jazo legez, andramarietan ez dira faltako dantza-plaza, dastaketak, poteoa, neska-mutilei begirako jarduerak eta gaueko dantzaldiak; ezta kuadrillen arteko paella-txapelketa ere, Mikel Zarate jai-batzordeko kideak baieztatu duenez.

Jaietako topagune garrantzitsua da ohiko gastronomia-lehiaketa horren hitzordua; izan ere, ekimen horretan ikusgarria da auzoko kuadrillen arteko lehia handia: ea nork egiten duen auzoko, herriko eta, beharbada, munduko paellarik onena; izan arrain, okel edo bakarrik barazkiz egindako paella. Lagun-taldeek nork bere osagai sekretuak erabiliz prestatu ahal izango dituzte euren arroz-platerak. Jakina, egindako chef-lana aurkeztu beharko du kuadrilla bakoitzak, jai-batzordeak banatuko dituen sarietakoren bat jaso gura izanez gero behintzat. Bestalde, Goi-Alde dantza-taldeak erakustaldia eskainiko du jaietan. Jai-batzordeak laster iragarriko du behin betiko egitaraua; oraindino antolaketa-lanetan dihardute eta.

Jaietako egitaraua

Abuztuak 14, martitzena

  • 18:00    Irrien lagunak.
  • 19:00    Trikiti-poteoa, tabernaz taberna.
  • 21:30    Txitxiburruntzi-jana.
  • 23:30    Erromeria Ozen taldeagaz.
  • 01:30    Zezen mekanikoa.

Abuztuak 15, eguaztena

  • 11:00    Egun osoan, elkartasun-igela.
  • 11:00    Egun osoan, umeei begirako puzgarriak.
  • 11:00    Paella-lehiaketaren hasiera; jai-batzordeak arroza banatuko du.
  • 13:00    Goi-Alde dantza-taldearen erakustaldia.
  • 14:30    Paellak aurkezteko ordua.
  • 16:00    Xaiborren ikuskizuna.
  • 18:00    Paella-lehiaketaren sari-banaketa.
  • 18:30    Kuadrillen arteko zenbait jolas antolatuko dituzte; ondoren, kupelak hustea.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun