Iritzia  Erandio 2018-09-17 13:22

Altzaga ikastola, 1968-2018

Ana Teresa Escudero Bizkarguenaga

Ospakizun urte honen lehengo bolandera bota dogu. Airean daborduko hainbat oroitzapen, amets, fustrazino eta batez be, etorkizunari begira, ilusinoa.

Altzaga ikastola, 1968-2018
Sei ikasle zituen ikastolak 1968an. © ERANDIOKO ALTZAGA IKASTOLA | Ikusi handiago | Argazki originala

Urtero legez, aurten be, hainbat familiak euren umetxua «sartu» dabe ikastolan, eta beste hainbaten nerabeak «urtengo» dabe ikastolatik. Hamalau bat urte hazten eta hezten, euskaraz, bardintasunean, eta batez be bizitza guztirako erreferentzia izango dan komunitatearen parte izaten. Altzaga da euren etxea! Altzaga da gure etxea!

Orain dala 50 urte proiektu hau amestu ebenentzat ez zan erreza izan, halan be umeak bialdu ebezan «ikastola» deitu eben pisu batera.  Aurten, proiektu honetan sinistu daben hainbat gurasorentzat be ez da erraza izan; baina zuloz, itokinez eta zementuz betetako eskolara eroan dabez umeak.

Ikasle kopurua ehunka biderkatu da. Helburuak eta beharrak, aldiz, ez dira asko aldatu. Erandion kalitatezko hezkuntza eskaintzea euskaraz. Ziklo bat bete dogu, gure lehenengo 50 urteak bete doguz, eta danon artean ospatu gura dogu. Ahoz aho, whatsappez, txioz edo txalapartaz deitu dagiogun Altzagako komunitate osoari, historia eta etorkizuna, urrezko ospakizun honetara.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa