Udako jaiak 2019

Egun biko festak izango dira aurten ere andramariak

Paella-lehiaketa egingo dute eguenean.

Erandiogoikoko Andra Mari jaien ekimen denak bi egunean metatuko dituzte aurten ere. Egitaraua osatzen dute paella-lehiaketak, dantza-erakustaldiak, erromeriak, ume-jarduerek eta abarrek.

Abuztuaren 14an hasiko dituzte aurten ere Andra Mariaren omenezko jaiak Erandiogoikoan, eguaztenean, jai-egunaren bezperan. Hurrengo egunean, eguenean, jaiak amaitu bitartean, askotariko ospakizunez gozatzeko aukera izango dute bertoko herritarrek eta auzora hurreratuko diren pertsona den-denek. Ohikoa bilakatu den legez, andramarietan ez dira faltako dantza-plaza, txitxiburruntzi-jana, poteoa tabernaz taberna, auzoko txikienei begirako jolasak eta gaueko dantzaldiak; ezta kuadrillen arteko paella-txapelketa ere.

Eskualdeko gainontzeko jaietan bezala, hemen ere topagune garrantzitsu bihurtu da gastronomia-lehiaketa horren hitzordua; izan ere, ekimen horretan lehia handia egon ohi da auzoko kuadrillen artean, ea nork egiten duen auzoko, herriko eta, beharbada, inguruko paellarik onena; izan arrain, okela edo barazki hutsez egindakoa. Parte-hartzaileek euren osagai sekretuak erabili ahal izango dituzte, nork bere platera osatzeko. Jakina, egindakoa aurkeztu beharko du kuadrilla bakoitzak, jai-batzordeak banatuko dituen sarietakoren bat jaso gura izanez gero behintzat. Bestalde, Goi-Alde dantza-taldeak erakustaldia eskainiko du jaietan.

Erandiogoikoko Andra Mari jaien egitarauaren berri izateko, deskargatu gure app-a, doakoa da!

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun