Bost udaltzain gehiago izango ditu Erandiok

Erandioko Udaltzaingoak bost agente eta auto bi gehiago izango dituela iragarri du gaur, prentsaurreko baten bidez, Aitziber Oliban alkateak. "Herritarrek segurtasun-sentsazio handiagoa izatea" da helburua, haren esanetan.

"Udaltzaingo moderno eta herritarrengandik hurbilekoa" gura duela azaldu du Aitziber Olibanek, "segurtasun-joera berriei erantzuten diena". Kalean dabiltzan udaltzainen presentzia handiagoa izateko erabaki da lantaldea handitzea, patruilatzeko auto gehiago izateagaz batera.

Bestetik, Udaltzaingoan teknologia berriak ezartzeko asmoa agertu du alkateak. Iragarritako neurriak segurtasunaren arloan Udalak duen planaren barruan daude, bertako agintarien berbetan.