Enpresa-batzordeko iturriek azaldu dutenez, LANen 25 langileetatik zortziri Enplegua Aldi Baterako Erregulatzeko Espedientea ezarri zaie, eta gainerakoei ere hiru hilabeteko soldatak zor izan dizkie enpresak. Hilabete eta erdi kobratu dute daborduko, eta honenbestez, beste hilabete eta erdikoa da zorra, "bi eta erdikoa abendukoa kobratzen ez badugu". Eta ez dirudi kobratuko dutenik.
Bere eremuan dabilen Espainiako Estatuko enpresa bakarra izan arren, bezeroak eta enkarguak murriztuz joan zaizkie; enpresa-batzordearen esanetan, Antonio Arredondo ugazabaren "kudeaketa negargarria" da egoera horri eragin duena: "Berandu ibiltzen gara epeak betetzeko, besteak beste material-faltagatik, eta bezero batzuek beste hornitzaile batzuengana jo dute; gabeziak ditugu garbitasunean eta segurtasunean, makina asko zaharkituta daude eta ez dira berritzen...". Segurantza Sozialari eta hainbat hornitzaileri ere dirua zor die enpresak. Zuzendaritzari egindako eskariek ez dute emaitza onik izan, salatu dutenez.
Erakunde publikoei laguntza eskatu diete langileek, industria-plan bat eginez eta inbertsio-egileak lortuz lan-karga berreskuratzeko eta modu horretan zor zaizkien soldatak kobratu eta erregulazio-espedientean dauden zortzi lankideak beharrera itzuli ahal izateko. Besteak beste, Eusko Jaurlaritzaren SPRI agentziagaz batu dira, eta hark emango dien erantzunaren zain daude. "Orain geldi daude kontuak ordea, Gabonak pasa arte ez da ezer mugitzen hasiko", diote. Zain dauden bitartean, etenda dituzte mobilizazioak.