Gai ugariren gainean itaundu zitzaien 16 urtetik gorako 600 erandioztarri iaz egindako inkestan: udalerriaren irudia, zerbitzuak, segurtasuna... Alkatearen esanetan, gehiengoak balorazio ona eman du arlo gehienetan, eta askok pentsatzen dute Erandiok hobera egin duela. Osasun eta Kultura arloek, besteak beste, onespen zabala lortu dute. Zerbitzu zehatzei dagokienez, Aitziber Olibanek hiri-autobusa aipatu du inkestan ondoen baloratutakoen artean. Oro har, 10etik 6 puntu eman diete herritarrek Udalaren irudiari, eta beste horrenbeste udal-agintariei.
Aldiz, aparkalekua eta segurtasuna hobetu beharko liratekeela erantzun dute askok. Olibanek adierazi duenez, Udalak aintzat hartuko du inkestaren ondorioetako bat, aplikatzea egokia den ala ez erabakitzeko: kaleetan zaintza-kamerak ipintzearen alde egongo liratekeela adierazi zuten erantzun zutenen %75 inguruk. Bestalde, kalean aske dabiltzan txakurren aurkako neurri gogorragoak ez hartzea leporatu diote askok Udalari; arlo horretan eragitea lehentasunezkotzat jo du alkateak, eta gehitu du Udala gaiaren gaineko ordenantza diseinatzen dabilela daborduko.
Puntuaziorik txarrena, zelangura ere, aparkalekuak lortu du. Ildo horretan, inkestan parte hartutakoen erdia agertu zen hirigunean kamioiak uztea debekatzearen alde; Udalak aukera hori aztertuko duela iragarri du. Alde positiboan, legealdi honetarako aurreikusitako hiru hirigintza-proiekturen alde erantzun du gehiengoak: Astrabuduako Meso kalea berrurbanizatzea eta Mendiguren plaza estaltzea, eta Altzaga auzoko San Agustin ingurua hobetzea.