Gizonkoteak eraistea

Emakume talde bat, beste emakume talde bat entzuten, eta gero haien ahotsa publiko egiten. Hotzean, hain dirudi sinplea ekintzak ezen ez baitu irudi mentalitate iraultza oso bat behar izan denik puntu horretara heldu ahal izateko, eta, halere, halaxe izan da. Erandioko Txoko Feministako kideek, bost urte eman dituzte Erandioko hainbat emakumeren testigantzak biltzen eta ordenatzen, eta, azkenik, orain egin dute publiko Maroma. Idatzi gabeko Erandioko historia dokumentala. Herriko zortzi emakume baino ez dira, kamera aurrean hizketan, eta nahikoa, halere, egunero arnasten dugun bortizkeria ikusgarri eta ikusezin guztia pantailaratzeko.

Axpe inguruan dagoen Sustraiak izeneko eskulturaren aipamenarekin abiatzen da dokumentala. Paulino Larrañaga eskultorearena da obra, eta, pieza txikiago batetik abiatuta, Erandioko Udalaren enkarguz egokitu zuen neurri monumentalera. Herriaren arima irudikatu nahi duten zazpi metro inguruko hiru giza figurak osatzen dute konposizioa: arrantzale batek, laborari batek eta fabrikako langile batek. Hiru gizonezkok, alegia. Eta nahikoa, halere, garaiko udal ordezkarien ustez, herriaren historia laburbiltzeko. Horregatik monumentuaren aipamena dokumentalean; eskultura horrek isilarazten duenari eskaini nahi diotelako ahotsa.

"Banku bat lapurtzea baino larriagoa da banku bat eratzea". Bete-betean asmatu zuen esaldiarekin Bertolt Brecht poeta alemaniarrak Hiru zentimoko opera antzezlanean, eta Erandioraino heltzen da haren oihartzuna. Martxoaren 8ko protestetan, hiru gizonkoteak pintura morez estalita esnatu zirelako, eta, noski, berehala hasi zirelako agertzen erasoaren aurkako gaitzespen mezuak sare sozialetan, bestela ere, eskultura hori, bere harrizko bake erraldoian, diru publikoz ibaiertzean zutik eta garbi mantentzea, ezeren aurkako eraso bat ez balitz bezala.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun