Erandioko Irakurle Taldeak skype bidez egingo du apirilaren 30eko saioa

Ohiko moduan izango ez bada ere, apirilean saioa egitea erabaki du Erandioko Irakurketa Taldeak. Oraingoan aukeratutako lana Kontrabaxua da, Patrick Süskindek idatzi eta Jose Ramon Egiluzek euskarara itzulitako antzerki-bakarrizketa. Skype erabiliko dute testuaz jarduteko, Iñigo Astiz kazetari eta idazleak gidatuta, ohi denez.

Irakurle Taldearen saioan parte gura dutenek lotura honetan aurkituko dituzte bai horretarako argibideak bai Kontrabaxua bakarrizketaren testu osoa ere. Antolatzaileek gogorazi dutenez, urte askoan Mikel Martinez aktoreak euskal antzokietan antzeztutako obra da apirilaren 30ean komentatuko dutena. Gomendatu dute lehenik testua irakurtzeko eta ondoren emankizunaren bideo bat ikusteko (hori ere aipatutako estekan klik eginda).

Hitzordua 19:00etan ipini dute. Parte-hartzaileek Skype aplikazioan duten erabiltzaile-izena jakinarazi beharko diote Irakurle Taldeari, edo Iñigo Astizegaz harremanean jarri (i01astiz). Saioa hasi aurretik alde teknikoan arazorik ez dagoela ziurtatzeko probak egingo dituzte, bide batez.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun