Koronabirusa Uribe Kostan

Premia duten familiei laguntzeko elikagaiak batuko dituzte Astrabuduako hainbat elkartek

CC BY SA-EPSOS.DE

COVID-19 pandemiaren ondorioz horren beharra duten Erandioko familiei emateko elikagaiak batuko dituzte Astrabuduako hainbat elkartek datorren astean. Galkorrak ez  diren jakiak eskatu diezkiete herritarrei. Jasotako elikagaiak banatzeaz Sortarazi GKEa arduratuko da.

Astrabu Club Motero, Astrabudua Taldea, Goitiko Taldea, Jai Batzordea, Radio Club Takolos, Astrabuduko Foto Club eta GUA taldeek egin dute bat ekimena martxan ipintzeko, Sortarazik lagunduta. Premiazkoak diren elikagaiak eskatu dituzte: esnea (baita umeentzakoa ere), zerealak, olioa, arroza, egoskariak, pasta, kakaoa, kontserbak, gailetak... 

Bilketa maiatzaren 29an (barikua) eta 30ean (zapatua) egingo dute, Astrabuduako Anbulatorio Zaharrean. Barikuko ordutegia 17:00etatik 20:00etara bitartekoa izango da, eta zapatukoa 10:00etatik 14:00etara eta 16:00etatik 20:00etara artekoa.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun