Koronabirusa Uribe Kostan

Lehen Hezkuntzako ikasleei etxeko lanak egiten laguntzeko sarea ipini dute martxan Erandion

Erandioko Udalak Ikaslagun izeneko sarea antolatu du, COVID pandemiak umeen ikasketetan duen eragina arintzeko asmoz. Funtsean, Lehen Hezkuntzako ikasleei etxeko lanak egiten laguntzeko boluntario-sarea da Ikaslagun. Laguntza ez da aurrez aurre emango, alde biek aukeratutako bide telematikoren bat erabiliz baino.

Ikaslagun bakoitzak erabakiko du ikasleari zelan lagundu. Ordutegia, berriz, ikasleak aukeratuko du. Izan ere, zerbitzua erabili gura dutenek formulario bat bete beharko dute, eta horretan adieraziko dute, besteak beste, zein egunetan eta gutxi gorabehera zein ordutan jaso gura duten laguntza, baita zein bidetatik ere (WhatsApp, telefono-deia, Google Hangouts, Zoom, Meet, TEAM edo Skype). Umearen adina eta zein mailatan dabilen ere zehaztu beharra dago. Ondoren, Udaleko Gazteria Zerbitzuak ipiniko ditu harremanetan ikaslea eta Ikaslaguna.

Laguntza behin eman daiteke, sortutako egun eta orduan, edo etengabe. Bigarren kasuan, Ikaslaguna prest egongo da ordu-tarte jakinetan ikaslearen telefono-deiei edo WhatsApp mezuei erantzuteko, 5-10 minutuz asko jota. Etxeko lanetako ariketetan zer eskatzen den azaltzean eta jarraibide batzuk ematean datza eskainiko den laguntza. 

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun