Emakumeen Jabekuntza Eskolak badu egitaraua 2020/2021 ikasturterako

Berdintasun Arloak sustatutako eta finantzatutako Emakumeen Jabekuntza Eskolak datorren ikasturtean eskainiko dituen ikastaroen berri eman du Erandioko Udalak bere Facebook orriaren bitartez. Parte hartu gura dutenek aldez aurretik izena eman eta berretsi beharko dute. Erandion erroldatutakoek izango dute lehentasuna.   

"Ahalduntze-prozesuen bidez emakumeen partaidetza soziala eta politikoa sustatzea du helburu Jabekuntza Eskolak", Udalak azaldu duenez. "Ahalduntzea gure izaeraren autokontzientzia hartzea da, autoestimua lantzea, gure gaitasunak ezagutzea eta emakumeoi dagokigun espazioa berreskuratzea". Hala, Jabekuntza Eskola, bestea beste, Erandioko emakumeen arteko topaketak, aliantzak eta ikaskuntzak egiteko lekua izango da, Udalaren esanetan. 

Honako bideak erabil daitezke datorren ikasturteko jarduera eta ikastaroetan izena emateko:

  • Telefonoa: 94 417 56 16
  • Posta elektronikoa: berdintasuna@erandio.eus
  • Ordutegia: 09:00-14:00 eta 16:00-18:00, astelehenetik barikura (barikuetan goizez baino ez)
  • Helbidea: Berdintasun Zerbitzua, Desanexio kalea 4 (Behargintza-Bekoa ikastetxea); Erandiogokoako Gizarte eta Kultur Etxea (16:00-21:00); Astrabuduko Udal Bulegoa
  • Webgunea: www.erandio.eus

Behar dutenek haurtzaindegi-zerbitzua izango dute, 2-10 bitarteko umeak jagoteko, beranduenez bost egun lehenago eskatuz.

Ikastaroak Altzagan, Astrabudua eta Erandiogoikoan emango dira. Hemen ikus daiteke programazioa xehe-xehe.  

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun