Erandioko Udalak zuzeneko laguntzak emango dizkie ostalaritzako negozioei

Establezimendu bakoitzari gehienez ere 1.000 euroko laguntza emango diote, COVID-19aren ondoriozko itxierak eragindako kalteak arintzeko, eta denera 120.000 euroko aurrekontua bideratuko da horretara. Dirulaguntza jasotzeko negozioaren ugazabek konpromisoa hartu behar dute gutxienez lau hilabetez zabalik edukitzeko establezimendua, eta 50 langile baino gehiago dutenak ezin izango dira onuradun izan.

Hainbat gastu finko ordaintzeko erabili ahal izango dira dirulaguntzak: argia, telefonoa, internet, hipoteka, alokairua eta aurtengo azaro-abenduko autonomoen kuota. Udalaren laguntzak beste administrazio batzuek emandakoakaz bateratu ahal izango dira.

Udalak abenduaren 31 baino lehe emango die dirua laguntzen hartzaileei, eta haiek, gero, otsailaren 28ra arte izango dute epea justifikatzeko.

Bestalde, gaur egun ez duten establezimenduek terraza eduki ahal izateko izapideak egiten dabil Udala; ostalaritza itxita dagoen epean zaborren tasa ordaintzeko salbuespena ezarri da, eta era berean, ez da terrazengatik tasarik ordaindu beharko 2021eko lehen hiruhilekoan (2020 osoan legez). 

Azkenik, Udalak jakinarazi du oraindino trukatu bako deskontu-bonuak dituzten establezimenduei otsailaren 28ra arte luzatuko zaiela hori egiteko epea (hasiera batean abenduaren 31ra artekoa izango zen). 

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun