Pertsona nagusien beharrizanak identifikatzeko behatokia abiatuko du Erandioko Udalak

Hurrengo asteetan adineko herritarrakaz jarriko dira harremanetan. © ERANDIOKO UDALA

Herriko pertsona nagusien behatoki bat sortuko du Erandioko Udalak. Alde batetik, pertsona horiek identifikatu eta dituzten beharrizanak ezagutu gura dituzte, eta, bestetik, boluntario-sare bat sortuko dute, horiei laguntza emateko.

Erandioko nagusien beharrizan eta nahiak identifikatzeko helburuagaz, behatoki bat sortuko du Udalak. "Horregaz pertsona nagusien soziabilitatea eta ekintzak hobetzea bilatzen dugu", adierazi du Aitziber Oliban alkateak; gaineratu duenez, egungo pandemia egoerak are beharrezkoagoa egiten du zerbitzu hori martxan jartzea.

Maite Perez Bilbao Gizarte Ekintza eta Garapenerako Lankidetza ordezkariak zehaztu du herrian dauden 60 urtetik gorako 7.200 herritarrakaz harremanetan jarriko direla. Horiek dituzten beharrizanak ezagutu eta aisialdirako jarduera-programak antolatuko dituzte. Udal-ordezkariek azpimarratu dute helburua dela bizitza aktiboagoa gura duten pertsonei ekintzak eskaintzea; isolamendua eta bakardade arriskuak saihestea, hain zuzen ere.

Era berean, udalerrian boluntariotza-sarea osatzezko prest dauden pertsonak ere identifikatu gura dituzte, adineko pertsonei laguntza eta akonpainamendua egiteko.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun