Aisialdirako gune bat sortu dute Axpe ondoko mendi-magalean

Axpe industriaguneko mendi-magala egonkortzeko lanak 2019an hasi zituzten. © ERANDIOKO UDALA

Axpe industriagunearen alboko mendi-magalean egin dituzten egonkortze-lanak baliatuta, aisialdirako gune bat egin du Udalak. Bere aldetik, EH Bilduk salatu du lan horiek erandioztarrek ordaindu behar izan dituztela, EAJren "kudeaketa txarraren" ondorioz.

Erandioko Udalak, Axpe industriagunearen ondoko mendi-hegala egonkortzeko lanak bukatuta, aisialdirako eta paseatzeko gune bat sortu duela jakinarazi du; era berean, Hiru Gurutzeetako bidea ere berriro zabaldu dute.

2018an luizi batek inguruko hiru enpresa hustea eragin zuen; gainera, ondorengo txosten-teknikoek ohartarazi zuten mendi-magalaren lurrak ezegonkorrak zirela. Hori konpontzeko, Erandioko Udalak eta Sprilur industriagunearen sustatzaileak ingurua egonkortzeko lanak egin behar izan zituzten. Horrela, 6,4 milioi euroko kostua izan duten lanok 2019ko udan hasi eta 2020ko abenduan bukatu ziren.

Orain, lan horiek baliatuta, Udalak egin duen aisialdirako gunea aurkeztu dutenean, EH Bilduk adierazi du egindako guztia EAJren "kudeaketa txarraren beste adibide bat" dela. Izan ere, koalizio abertzalearen arabera, obra horiek egitearen erantzukizun zuzena industriagunea eraiki zuen Sprilur sozietate publikoarena zen. Horren harira, oposizioko taldeak azpimarratu du Udalak uko egin ziola erantzukizun hori erreklamatzeari, eta egonkortze- eta urbanizazio-lanen kostuaren % 50 bere gain hartzea onartu zuela, "ia 4 milioi euro".

Horretaz gainera, koalizio abertzaletik adierazi dute egonkortze-lanei ekiterakoan, balio historiko eta geologiko handiko harri bolkanikoak ere aurretik eraman zituztela.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun