Itsadarra ezagutzeko bisita gidatuak eskainiko ditu Erandioko gasolinoak

Erandio eta Barakaldo batzen dituen gasolinoak bisita gidatuak egingo ditu datozen hilabeteetan. Ondare industrial eta kulturala ezagutzera emateko ekimenak emaitza onak baditu, turismo-zerbitzu egonkorragoa ezartzea aurreikusi dute.

Itsasadarraren ondare industrial eta kulturala ezagutzera emateko helburuagaz, Erandioko gasolinoak bisita gidatuak egingo ditu maiatza, ekaina eta uztailean zehar. Konkretuki, zapatuetan egingo dira (maiatzak 8 eta 15, ekainak 5 eta 12 eta uztailak 3 eta 10), 11:00etatik 13:00etara bitartean. Gasolinoak itsasadarreko urak zeharkatzen dituen bitartean, gidari batek industria eta merkataritzaren inguruko argibideak emango dizkie bisitariei, Bilbok izan zuen lehendabiziko portutik, gaur egun arte, hain zuzen ere. Irteerek ibilbide bi izango dituzte: itsasadarrean gora San Anton zubira arte edo Abrara norabidean.

Erandioko Udalagaz batera bultzatutako ekimen hau turismoaren eragile garrantzitsua izan daitekeela deritzo Jorge Gonzalez enplegu, turismo eta berdintasun zinegotziak. "Iaz egiteko asmoa genuen, baina COVID-19aren ondorioz, beste hainbat ekintza bezala, bertan behera geratu zen; orain baldintzak ematen direla uste dugu, baldin eta osasun neurriak betetzen badira", zehaztu du.

Ekimen honegaz Erandioko gasolinoaren balioa ere nabarmendu gura izan dutela azpimarratu du zinegotziak: "Herriaren iragan industrialagaz lotura handia duen garraiobidea da, eta turismo arlotik uste dugu irteera hauekaz bere egoera ekonomiko larria arintzen lagunduko diogula". Gaineratu du ekimenak arrera ona izanez gero zerbitzua egonkortuko dutela, data eta aukera gehiago txertatuz.

Gasolinoak 25 pertsonentzako edukiera dauka, eta irteeretarako izen ematea udal-webgunearen bitartez egingo da, lotura honetan. Txangoak elebidunak izango dira, euskaraz zein gazteleraz. Prezioei dagokienez, ateraldi bakoitzak 5 euro balioko ditu, 3 euro 18tik berakoentzat eta doan 4 urte baino gazteagoentzat.

Erlazionatuak

Erandioko gasolinoaren etorkizuna kolokan

Erandio

Gasolinoak 120 urte daramatza Erandio eta Barakaldo batzen; jendea ibaiaren ertz batetik bestera pasatzen. Baina zerbitzu horren etorkizuna zalantz...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun