Industria babestearen aldeko ekimena egin du Erandioko Sortuk

Apirilaren 24an egin zuten ekimena Erandion. © SORTU ERANDIO

Industria-sektorea defendatzeko beharra aldarrikatzeko ekimena egin zuen Erandioko Sortuk apirilaren 24an, zapatuan. Herrian hainbat lantegi itxi eta lanpostu galdu direla-eta, hori geldiarazteko errezeta proposatu du taldeak: "Langile kontzientzia, batasuna eta borroka".

Zapatuan, apirilaren 24an, Erandioko Sortuk herriko industriaren aldeko ekimena gauzatu zuen; horretan, etorkizun duin bat finkatuko duten lanpostuak mantendu eta sortzeko beharra aldarrikatu zuten.

Sektoreak bizi duen egoera azaltzeko, herrian itxi edo lekuz aldatu dituzten hainbat lantegiren izenak zerrendatu zituzten. Horrez gainera, adierazi zuten herriaren iragana, orainaldia eta etorkizuna direla horiek; "langileen lana eta borrokaren emaitza".

Cables y Alambres Reunidos lantegiaren kasu adierazgarria nabarmendu zuten: "Mende bateko ibilbidea eta gero, aktibo zeuden 120 lanpostu desagertu dira; enpresa adierazgarrienetako bat desagertzen utzi dute, konponbiderako inolako asmorik gabe". 

Era berean, gaineratu zuten langileria "eskulan merkea, prekarioa eta indibidualizatua" bihurtu gura dutela: "Langileok argi dugu, baldintza duinak izango dituen etorkizuna ezin da zerbitzu sektore prekarizatuan oinarritu, plan industriala behar dugu". Egoera horri aurre egiteko errezeta ere proposatu zuten ekitaldian: "Langile kontzientzia, batasuna eta borroka".

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun