Kaleko animaliak batzeko sistema hobetuko dute Erandion

Familiek hilabete izango dute adoptatutako txakurra etxera egokitzen den erabakitzeko.

Erandioko Udalak kalean dauden animaliak batzeko sistema berria kontratatzeaz gain, erraztasunak ere jarriko ditu txakurrak adoptatzeko. Bestalde, apirilaren 1etik, Udaltzaingoak 18 esku-hartze egin ditu txakurrak kontrolatzeko kanpainaren testuinguruan.

Erandioko Udalak animaliak batzeko sistema berriztu du, eta, orain, animaliak, batu, zaindu eta kudeatzeko ardura Quincocan enpresari esleitu dio, urtean 48.158 eurogatik. Zerbitzu berri horregaz animaliak egunero batuko dituzte, gehienez 40 minutuko tarteagaz.

Lehenago Erandioko Udaltzaingoak egiten zuen animalak batu eta zaintzeko lana, udaletxean horretarako egokituta zegoen gunea.

Udal-iturriek adierazi dute iaz 11 txakur jaso, eta kalean beste 15 batu zituztela; horietako 8 bere jabeei itzuli zizkieten. Aldi berean, azaldu dute animalia bi sakrifikatu zituztela: bata berreskuratzeko aukerarik gabeko animalia arriskutsua zelako, eta, besteak, gaixotasun larri bat zeukalako. Aitziber Oliban alkateak azaldu duenez, "erabaki hori txakurren etologo batek aginduta", hartutako neurria izan da.

10 txakur etxe bila

Familia bila dauden animalien adopzioa errazteko asmoagaz, udal-arduradunak erraztasunak bilatzen ari direla ere jakinarazi dute; izan ere, Udalak 10 txakur ditu etxe bila daudenak. Horretarako, udal-webgunean animalien argazkiak txertatzea edo horiek zuzenean ikusteko egun bat aukeratzeko ikertzen ari dira.

Horretaz gain, txakurrak hartzea erabakitzen duten pertsonek hilabete izango dute horiekaz geratzen diren erabakitzeko; denbora horretan, Udala arduratuko da elikadura- eta albaitaritza-zerbitzuaz. Gainera, familiek jarraipen- eta tutoretza-zerbitzua ere jasoko dute.

Animaliak kontrolatzeko kanpaina

Erandioko Udalak apirilaren 1ean ekin zion etxeko-animaliak kontrolatzeko kanpainari; ordutik, Udaltzaingoak egin dituen 93 errutinetan 18 esku-hartze egin dituztela jakinarazi dute. Horietan, egoera txarrean zeuden lau txakur antzeman dituzte, eta arraza arriskutsuko txakurrak solte edo muturrekorik gabe eramateagatik bost pertsonek isunak jaso dituzte; beste txakur-jabe bat zigortu dute umeentzako parkean txakurra aske edukitzeagatik, eta beste bat kakak ez batzeagatik.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun