Erandioko etxez etxeko laguntza-zerbitzuko langileei ezarritako lan-egutegia bertan behera uzteko eskatu zuten LAB sindikatuko delegatuek. Horretarako, Erandioko Udalaren azken osoko bilkura baliatu dute, funtsezko zerbitzu hori eman eta jasotzen dutenen baldintzak hobetzeko neurriak exijitzeko.
Sindikatu abertzaleko ordezkariek azaldu dutenez, Erandioko gobernu-taldeak langileen lan-egutegia aldatzea erabaki zuen uztailean, Gabonetako zein Aste Santuko egun libreak kenduz. Gaitzetsi dute erabaki horregaz langileek lanegun gehiago eta egun libre gutxiago izango dituztela. Adierazi dutenez, "lan-baldintzen funtsezko aldaketa horrekin Udalak diru apur bat aurreztuko du, egun horietan ordezkapenak egiten dituzten lan-poltsako langileen gastua, hain zuzen ere".
Egoera salatzeko, etxez etxeko laguntza zerbitzuko langileek eguaztenetan elkarretaratzea egiten dute udaletxe aurrean, euren kexak adierazteko.