Hil honetan, "Nork bere arazoak" izeneko berbaldi sorta dakar Gautxoriak kultur elkarteak Erandiora. Bertan, egungo jendartean dauden erronkei erantzuteko eredu interesgarriak jorratuko dituzte: alde batetik, eguneroko erosketa saskiari erreparatuko diote Labore supermerkatu kolaboratiboko kideek, azaroaren 11n; bestetik, energia komunitateak aurkeztuko dituzte Goiener kooperatibako kideek, azaroaren 18an. Biek jarriko dute erdigunean komunitatea, jasangarritasuna, gertutasuna eta erabakitzeko ahalmena. Berbaldiak 19:00etan izango dira, Gautxoriko lokalean lehena eta Gazte Txokoan bigarrena.
Antolatzaileek adierazi dutenez, "hitzaldiok entzuteko baino, zalantzak argitzeko eta sormenerako guneak izango dira". Izan ere, bertan, hizlariek egungo proiektu errealen inguruan arituko dira, gertuko adibideak, abian dauden proiektuak eta horietan emandako prozesuak azalduko dituzte, hain zuzen ere.