Erandioko ikastetxeetako 400 ikasle baino gehiago pasatuko dira Gaztetxotik egun hauetan. Azaroaren 10etik 12ra bitartean, Udalak antolatu duen Zientziaren Astea dela eta, ikerkuntza eta esperimentazioaren munduan barreiatzeko aukera izango dute. Bertan, ikasleek alor ezberdinetako esperimentuak egingo dituzte, zientziekiko interesa pizteko eta sormena eta talde-lana bultzatzeko asmoagaz.
Gazteek, STEAM zientzia-lanbideakaz lotutako paradigman oinarritutako esperimentuak egingo dituzte; hau da, zientzia, teknologia, ingeniaritza, artea eta matematikaren ezagutzan oinarritzen diren diziplinarteko ikasketa-prozesua baliatuko dute.
Horretarako, zientzialari gazteek hiru gune izango dituzte, eta bakoitzean jarduera praktiko bat egingo dute: natur-zientzietakoa, biologia eta geologia; ingeniaritzakoa, matematika, fisika, logika eta eraikuntza; eta, azkenik, informatika eta elektrizitatea. Gune horietan, ikasleek modu aktibo eta parte hartzailean esploratu ahalko dute, beraien kabuz hipotesiak eginez eta erantzunak bilatuz.
Guztira, IES Erandio, Jado eta IES Astrabuduako 408 ikaslek parte hartuko dute ekimenean, txandaka eta taldeetan banatuta, guztiek esperimentu denak probatzeko aukera izan dezaten.