Erandioko GTO-ko langileek bigarren mailako langile gisa ez tratatzea exijitu dute

Erandioko GTO-ko langileek elkarretaratzea egin zuten atzo, azaroaren 15ean, Gestamp taldeak Derion dituen bulegoen atarian beraien egoera salatzeko. Deitoratu zuten Lan Ikuskaritzak baieztatutako langileen lagapen irregularrak bere baitan jarraitzen duela, eta lantoki berean dauden GTE-ko langileen eskubide eta lan-baldintza berak exijitzen dituzte.

Duela urtebete, Lan Ikuskaritzak egindako ikerketa baten ondorioztatu zen Gestamp enpresak Erandion duen lantokian langileen lagapen irregularra gertatzen ari zela. Lantoki horretan bi sozietate daude: GTE eta GTO. Salatu dutenez, azken horretako 50 langile inguruk beste enpresakoek baino askozaz ere lan-baldintza okerragoak omen dituzte, nahiz eta lan bera lantoki berean egin. Lan Ikuskaritzak hori irregularra zela atzeman zuen, hain zuzen ere.

ELA sindikatuko ordezkariak azaldu duenez, Gestamp-ek ez du egoera arautzeko inongo asmorik erakutsi, eta, gainera, langileak egoera prekarioan eta Aldi Baterako Enplegua Erregulatzeko Espedientearen (ABLEE) daude. "Egoera jasanezina da GTO-ko beharginentzat eta Gestamp taldearen baitan bigarren mailako langile direla sentitzen dute", adierazi dute sindikatutik.

Gaineratu dute epaitegietara jo dutela lagapen irregularren ondorioak salatzeko, baita ABLEE baliogabe uzteko eskatzeko ere. Bien bitartean, egoera salatzeko bilkura egin dute Gestamp taldeak Derion dituen bulegoen atarian.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun