Datorren urteko urtarriletik aurrera, lan-merkatura sartzeko zailtasunak dituzten kolektibo erandioztarrei laguntza emateko eta lan-aukerak areagotzeko enplegu-plana abiatuko du Udalak. Bestak beste, gazteak, emakumeak, 45 urtetik gorakoak, iraupen luzeko langabeak, gizarte-bazterketa arriskuan daudenak edo COVID-19aren ondorioz beraien lana galdu duten pertsonak izango dira egitasmo honen onuradunak.
Edizio honetan, langabeen prestakuntza-aldeak landuko dituztela azaldu dute Erandioko udal-iturriek. Horren helburua da pertsona horiek kalitatezko enplegu egonkor bat bilatzeko aukera izatea, eta eskaera handiena duten enpleguen inguruko informazioa partekatzea eskualdeko enpresakaz.
Gainera, laneratzeko zailtasun bereziak dituzten eta lan-merkatutik baztertzeko arriskuan dauden pertsonen artean 41 langabe kontratuko dituzte sei hilabetez, lanaldi osoan, horien enplegagarritasuna hobetzeko helburuagaz; horren bitartez, beraien gaitasun pertsonalak eta motibazioa indartzeko aldi baterako lan-esperientzia jasoko dute.
Jorge Gonzalez zinegotziak azaldu duenez, berritasun gisa, lanpostuetako bederatzi dibertsitate funtzionala duten pertsonentzat gordeko dituzte, baldin eta gutxienez % 33ko desgaitasuna dutela egiaztatzen badute. Zehaztu duenez, ekimen hau gauzatzeko, 893.608 eurotik gorako inbertsioa egingo du Erandioko Udalak.
Sortuko diren 41 lanpostuak hauek dira: udal guneak eta eraikinak berreskuratzeko mantentze-lanak egitea, tokiko administrazioa digitalizatzen laguntzea eta, azkenik, Erandioko adinekoei arreta soziosanitarioa ematea. Profil profesional hauek hautatuko dira: 19 obrako peoi, obrako monitore bi, administrari bat, 12 peoi lorezaintza-lanak egiteko, lorezaintzako begirale bat, arreta soziosanitarioko bi, pertsona bat web-diseinuko lanetarako eta hiru digitalizaziorako.
Parte-hartzaileen baldintzak
Enplegu-plan honetan parte hartzeko, onuradunek honako baldintza hauek bete beharko dituzte: 2019ko eta 2020ko enplegu-planetan kontratuak ez izana, adinez nagusiak izan behar dute eta Lanbiden izena emanda egon behar dute enplegu-eskatzaile gisa.