Erandioko Murueta ontziolak Tuugaalik arrantza-ontzia uretaratu du aste honetan. 82,30 metroko luzera duen lantegi- eta izozkailu-ontzia 2023an bukatzea aurreikusi dute, eta, orduan, Groenlandiako gobernuarena den Qalearik armadoreari emango diote. Muruetako ontziolek Groenlandiako armadorearentzako egiten duten laugarren itsasontzia da.
Puntako teknologiagaz ekipatutako arrantza-ontzi honek Ipar Atlantikoan eta Ozeano Artikoan ganbak arrantzatu, prozesatu eta izoztuko ditu. Bere diseinu eta teknologiari esker, itsasontziak arrantzatuko dituen ganbak egosi eta paketatuko ditu, produktua banatzeko prest utziz; horretarako, ontziak erabat automatizatutako faktoria izango du.
Murueta ontziolatik azaldu dutenez, honek "funtsezko mugarri bat betetzen du: tripulaziorako eta mota guztietako operazio eta baldintza meteorologikoetarako segurtasun-estandar altuenak txertatzen baititu. Helburua tripulazioari bizitza ahalik eta erosoena egitea da".
"Pauso sendoa"
Ontziolarentzat, "hau urrats sendoa da erreferentziako ontziola gisa posizionatzeko, porturatze-ontziak fabrikatzen dituztenean", adierazi dute. Bestalde, gogoratu dute ontziolak martxan daramatzan 80 urteetan 326 itsasontzi eraiki dituela.
Horregaz batera, ontziolan Murueloil armadorearentzako propultsio hidrikoko erregaia erabiltzen duen ontzi bat ere ari dira eraikitzen, eta 2022an entregatzea aurreikusi dute. Propultsio hibridoz diseinatutako mota horretako lehen ontzia izango da, bateriak erabiliz energia biltegiratzeko sistema berritzaile bat baliatuko baitu. Gainera, ontziolak azken belaunaldiko propultsio diesel-elektrikoko bi karga-ontzi ere baditu egiteke.