Doinua: Bazkalosteko kafea
Pertsiana altxatu eta aibala!
Guztiz zurituta lurra.
Aldaketa klimatiko honek
eman ohi digu egurra.
Erandio Desierto zurituta
ikusi ez da gezurra!
Iluntasunak eta hoztasunak
eman dezake beldurra…
Baina leihotik begiratuta
zein ederra den elurra!
Ana Urrutiak Teleberrian
asmatuko ote luke…
Kostara helduko ote zenik
inortxok ez zuen uste.
Urtero Ibaizabal zurituta
gustora hartuko genuke.
Horrelako elurteek gauza
onak ekartzen dituzte;
esaerak dioen bezala:
elur urte, ezkur urte!
Lutxanara zuzen joateko
kaian hartuaz txalupa,
sartu eta jausi egin zaigu
gainera elur maluta.
Artez Ezkerraldera heltzeko
patroiak lema hartuta,
argitasunak erakusten du
ez gabiltzala galduta…
Gozatu elurra zein negua
ez baitago amaituta!