Eureka Domeka!

Domeketako kultur jarduerak Erandioko malekoira bueltatuko dira irailean

Ander Zarraga 2022ko abu. 30a, 12:02

Iaz hasi zituzten "Eureka Domeka!" kultur ikuskizunak itsasadarraren ertzean. © GAUTXORIAK

Iaz hasi zuten ekimenaren erantzun ona ikusita, Erandioko Gautxoriak elkarteak "Eureka Domeka!" kultur zikloa errepikatuko du aurten. Iragarri dutenez, iraileko domeketan egingo dituzten hiru saioetan Anari eta Porrumentzio musikariak eta bertsolaritza eta marrazketa inprobisatua egongo dira.

Ekimen horregaz, Erandioko Gautxoriak elkarteko kideen asmoa da "herria biziaraztea eta euskara plazarekin lotzea"; horretarako, hiru saio antolatuko dituzte iraileko domeketan, guztiak "mimoz eta gustuz prestatuak". Ikuskizunak malekoian egingo dituzte, Gasolinoaren geralekuaren ondoan, 18:00etan hasita. Euria eginez gero, emanaldiak Gautxoriak elkartearen egoitzara eramango dituztela jakinarazi dute.

Lehen emanaldia Anari bakarlariaren eskutik etorriko da irailaren 11n. Horren ostean, 18an, Unai Iturriagak gidatuta, Eider Eibar ilustratzaileak eta Joseba Larretxe komikigileak paper zuriaren krisiari egin beharko diote aurre Iturriagak proposatzen dizkien gaiei erantzunak emanez. Antolatzaileek azpimarratu dutenez, marrazketa inprobisatuak "publikoaren sorpresa eta barregura piztu zuen aurreko urtean", horregatik, aurten ere bertaratzen direnek barre algarak bermatuta izango dituztela baieztatu dute. Bukatzeko, Porrumentzio musikariaren autokudeatutako musika estilo librezale eta anarkikoak itxiko du zikloa irailaren 25ean.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun