Bizkaiko metalgintzako langileak berriz ere kalera aterako direla iragarri dute ELA, LAB, CCOO eta UGT sindikatuek; horretarako, greba-deialdiak egin dituzte hilaren 27 eta 28rako eta azaroaren 2rako. Zehazki, ELA sindikatuak Erandion egingo du lehen elkarretaratzea, 11:30ean Altzagako metro-geltokian.
Sindikatuek azaldu dutenez, hitzarmena lortzeko 15. bilera izan zuten atzo Bizkaiko metalaren sektoreko enpresen federazioagaz (FVEM). Baina bilera horretan patronalak proposatutako neurriak ez zituen sindikatuen eskariak asebete: "Patronalak planteatutako edukiak ez dira hurbiltzen ELAk urriaren 19an planteatutakora. Izan ere, ez da langile guztientzako KPIaren igoerarik bermatzen, ez dago aurrerapausorik lanaldi murrizketan, ezta subrogazioan ere, ez dira ETTak kontrolatzen, ez da Bizkaiko metalean nahitaezko arbitrajea saihesten, ez dago aurrerapausorik berdintasun planetan...".
Horren ondorioz, gehiengo sindikalak hainbat mobilizazio iragarri ditu aipatutako hiru egunetarako. Iragarritako hiru egunetan, enpresen atarian elkartuko dira eta, Erandioz gain, manifestazioak egingo dituzte 27an Durangon, 28an Barakaldon eta azaroaren 2an Bilbon.
#BizkaikoMetala edukiak dituen hitzarmen bat lortzeko, borroka da bide bakarra!
— ELA Bizkaiko Metala (@ELAMetalBizkaia) October 25, 2022
Ostegun honetan 11:30etan #Erandio|ko metro geltokian.#BizkaikoMetalaBorrokan #BizkaikoMetalaGreban pic.twitter.com/lEjnb6GJFE