Erandio kirol egokituaren hiriburua izango da datozen bi urteetan

Erandioko Udaleko eta Kirol Egokituaren Euskal Federazioko ordezkaria hitzarmena aurkezten. © ERANDIOKO UDALA

Udalerriko kirol-instalazioak 2024an Parisen egingo diren Paralinpiar Jokoetara joango diren kirolarien prestalekua izango dira. Hori publiko egiteko, Kirol Egokituaren Euskal Federazioko (KEEF) presidenteak, Javier Condek, eta Aitziber Oliban Erandioko alkateak lankidetza-hitzarmena sinatu dute, hiru urteko elkarlanaren ostean.

Erandioko kirol-instalazioak goi-mailako kirolarien prestakuntzarako teknifikazio-puntuak izango dira 2023an eta 2024an. Bertan prestatuko dira bi urte barru Parisen egingo diren Paralinpiar Jokoetan parte hartzeko hautagaiak izateko borrokan egongo diren 26 euskal ordezkari, baita bi urte geroago Milanen egingo diren Neguko Jokoetarako ere.

Horretaz gain, hurrengo urtean sentsibilizazio kanpainak, formakuntzak eta lehiaketak, hala nola Altzagako kiroldegiko instalazioetan igeriketa-liga, Euskadiko mahai-teniseko txapelketa edo boccia lehiaketak. 

Urtez urte, gero eta kirolari Bizkaitar gehiago ari dira Paralinpiar Jokoetan: Rio de Janeiron lau izan ziren eta Tokion bederatzi. Aurten, Parisen egingo diren Jokoetan 12 ordezkari sartzeko helburua dutela iragarri du Javier Conde Kirol Egokituaren Euskal Federazioko (KEEF) presidenteak. Hain zuzen ere, hori da gaur egun federazioan dagoen bizkaitar kirolarien kopurua.

"Lankidetza horren ondorioz, Erandio Joko Paralinpikoen bidean dauden Euskadiko errendimendu handiko kirolarien prestakuntzaren parte garrantzitsua izango da", azpimarratu du Condek. Gaineratu duenez, hitzarmena aitzindaria, ez baita beste inon egin, eta horrelako ekimenek lehen mailako kirolariei beren teknifikazioan lan egitea ahalbidetzen die eta "kirol egokituari ikusgarritasuna ematen dio".

Erandioko alkatea oso pozik agertu da, "hitzarmenak Erandion lehiaketa garrantzitsuak hartzea ahalbidetuko duelako". Halaber, gaineratu duenez, "kirol jarduera hasi gura duten udalerriko dibertsitate funtzionala duten pertsona guztiei informazioa, orientazioa eta laguntza emateko gune bat landuko da".

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun