Erandion bakarrik bizi diren 60 urtetik gorako 1.478 pertsona daude, biztanleriaren % 6 baino gehiago, hain zuzen ere. Pertsona horien nahi gabeko bakardadeari aurre egiteko eta egoera horrek sortzen dituen ondorio negatiboak txikitzeko, Udalak enplegu-plan bat sortzeko aukera ikusi du.
Aditu askok baieztatu dutenez, bakarrik bizi diren pertsona nagusiek alkohol-kontsumo handiagoa, antsietate- eta depresio-koadro sarriak, loaren alterazioak eta hilkortasun goiztiarraren arrisku bikoitza izan dezakete. Hori ekiditeko, Udalak langabezian dauden 12 pertsona kontratatuko ditu sei hilabetez. Egitasmo honen helburua da parte-hartzaileei laguntzea beren autonomia eta garapen pertsonalerako itxaropenak hobetzen, laneratzearen bidez.
Era berean, horretarako, hainbat jarduera proposatuko dizkiete pertsona horiei: hitz egitea, paseatzea, irakurtzea, kartetan jolastea edo erosketak egitea, kudeaketa medikoak, banketxeak edo ekitaldi sozial edo kulturaletara joatea. Horren guztiaren helburua da bizi-baldintzak hobetuko dituen zahartze aktiboa sustatzea, laguntza-sareak sortzea eta adinekoen gizarte-ingurunea indartzea, gizarte-isolamenduari aurre eginez.
Parte-hartzaileak
Proiektu honetan parte hartzeko aukera eskainiko diete bakarrik bizi diren edo egunaren zati handi bat konpainiarik gabe igarotzen duten udalerriko adineko edo mendeko pertsona guztiei, baita San Jose Egoitzan bizi direnei eta bakardadean dauden Eguneko Zentroko erabiltzaileei ere.
Era berean, Erandio Gure Nagusiekin programan parte hartuko duten pertsonak kontratatzeko hautaketa-prozesua otsailaren erdialdean egingo dute.
Zerbitzua eskuratzeko hiru baliabide jarri dituzte: 944 890 233 telefonora deituz, bsocial@erandio.eus posta elektronikora idatziz edo aurrez aurre Irailaren 23a plazako Astrabuduko Meso Kaleko 20an dauden udal-bulegoetan.