Erandioztar baten etxegabetzea salatzeko kontzentrazioa egingo dute eguenean

Ander Zarraga 2023ko mai. 23a, 12:23

Kaleratze-data hainbatetan atzeratzea lortu duen arren, La Caixa banketxearena den etxean bizi den erandioztarra kaleratzeko data egunenean ezarri dutela jakinarazi dute Bilboko Kontseilu Sozialistaren Etxebizitza Sindikatuak eta Uribe Kostako Gazte Koordinadora Sozialistak. Etxegabetzea salatzeko eta pertsona horri babesa adierazteko elkarretaratzea egingo dute maiatzaren 25ean, 10:30ean, Tartanga kaleko 8-J atarian.

Aipatutako erakundeek salatu dutenez, "pertsona hau bost urtez egon da gaur gaurkoz La Caixa bankuarena den etxe horretan bizitzen, eta etxegabetzea atzeratzea lortu badu ere, azkenengo hau behin betikoa dela ematen du". Gaineratu dutenez, pertsona horri "instituzioen aldetik aukera bat eskaini bazioten ere gaur egun ukatu egin diote eta hautabide hori ez dago mahai gainean. Gainera, mehatxu telefonikoak jasan dituela salatu du".

Era beran, Etxebizitza Sindikatuak salatu du banku, inbertsio-funts eta kapital handientzat higiezinen merkatua euren irabazi ekonomikoa zein eragin sozial eta politikoa handitzeko bitartekoa dela: "Nahiago dute jendea gero eta baldintza ezegonkorragoetara eta prekarioagoetara kondenatzea, beste aldean etxebizitza hutsak pilatzen dituzten bitartean". Horren aurrean, eguneko elkarretaratzean parte hartzera deitu dituzte herritarrak eta "etxegabetze forma oro, era iraunkorrean eta baldintzarik gabe, bertan behera geratzea exijitzea beharrezkoa dela", aldarrikatu dute.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun