Gertakaria pasa den domekan izan zen, uztailaren 16an. Erandioko Obrador AsuaBerriko enpresan, goizeko ordu txikitan, 61 urteko langilea zendu zen istripu ez-traumatikoz, OSALANek jakitera eman duenez. Hala, LABek argi azpimarratu gura izan du heriotza horren eta langilearen lan baldintzen arteko lotura: "Nahiz eta patronalak zein Mutualitateek istripu ez-traumatikoak kontingentzia arruntetan kokatu nahi dituzten, gero eta nabarmenagoa da laneko arriskuek zerikusi zuzena dutela heriotza hauetako askorekin".
LABen esanetan faktore zehatz batzuek eragina dute langileen istripu ez-traumatikoetan: "Lan karga, erritmoak, ordutegia eta lana pertsonari egokitze ezak eragin nabarmena du istripu mota honetan eta arrisku hauek ere prebentzio neurriak behar dituzte".
Horrenbestez, deitoratu du banaketa dela, garraioaren barnean kokaturik, arazo kardiobaskularrei lotuta heriotza tasa handiena duen sektorea (% 33 sektore guztiak aintzat hartuta baina % 75 garraioan, 2022an). "Bistan da beraz, badirela lanari lotutako arrisku faktoreak heriotza hauetan eta patronalari zein gobernuei ardurak banatzea exijitzen diegu", salatu du.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
