Erandio adinekoentzako udalerri lagunkoiagoa izan gura du

Ander Zarraga 2023ko aza. 23a, 14:58
Egitasmoa 2025etik aurrera jarriko da martxan, diagnostiko-fasea egin ostean. © ERANDIOKO UDALA

Erandio Lagunkoia izeneko egitasmoaren helburua da udalerria pertsona nagusientzako atseginagoa izatea eta horien bizi-baldintzak eta integrazioa hobetzea. Horregaz hasteko, 65 urtetik gorako herritarren iritziak batu gura dituzte segurtasuna, mugikortasuna, lana, komunikazioa edo zerbitzu sozialak bezalako gaien inguruan, egoeraren diagnosia egiteko. 

Erandioko Udalak Euskadi Lagunkoi ekiemenagaz bat egin du, eta, horregaz hasteko, egitasmoaren aurkezpenean, Bizipoz kooperatibagaz batera egoeraren diagnostikoa egingo dutela iragarri zuen Aitziber Oliban Erandioko alkateak. Udalburuak azaldu zuenez, lehen azterketa fase horretarako lau topaketa egingo dituzte, bereiziki pertsona nagusiei zuzenduak egongo direnak, baina baita zaintza-lanak egiten dituztenentzako edo interesa duen edozein herritarrentzako ere.

Lehen topaketa astelehenean, hilaren 27an, egingo dute eta aire zabaleko guneen ingurukoa izango da. Abenduan beste hiru egingo dituzte: 4an, segurtasuna; 12an, mugikortasuna; eta, azkenik, 18an, etxebizitza eta irisgarritasuna. 

Ekimen horri esker, erandioztarrek beraien egitasmoak aurkeztu ahal izango dituzte, eta horiek kudeatzeko talde eragile bat eta gai konkretuetara bideratutako beste zortzi talde osatuko dituzte hainbat gai jorratzeko, hala nola aisialdia, segurtasuna, parte-hartzea, mugikortasuna etab. 

Diagnostiko-fasea 2024ko urte bukaerara arte luzatzea aurreikusi dutela azaldu zuen Beatriz Santamaria Bizipiz kooperatibako kideak, eta iragarri zuenez, "hiru eta lau urte barru egingo dira ekintzak, eta, ondoren, urtebetean zehar, horien ebaluazio bat egingo da".

"Erandio Lagunkoiak adinekoen bizi-baldintzak hobetzeaz gain, komunitate osoaren gizarteratzea eta ongizatea sustatu nahi ditu", adierazi zuen Maite Perez Gizarte Ekintzako zinegotziak.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun